Protesta në Mal të Zi u organizua në Facebook, të arrestuar edhe gazetarë

Protesta në Mal të Zi u organizua në Facebook, të arrestuar edhe gazetarë Mal i Zi -Në protestat e së shtunës(15.02.2014) në Podgoricë mbetën të plagosur 9 policë nga përleshjet me 300 protestues. Qytetarët marshuan në selinë qeveritare duke kërkuar dorëheqjen e administratës për shkak të papunësisë, korrupsionit dhe kushteve të vështira ekonomike. Protestuesit qëlluan me gurë duke plagosur disa policë. Nga ana tjetër, edhe forcat e policisë u kundërpërgjigjën me gaz lotësjellës për të ndaluar protestuesit. Protesta u organizua në Facebook me titull 'Revolucioni në Mal të Zi, çdo njeri të dalë në rrugë'. Organizatori i protestës Ljubo Varagic i bëri thirrje malazezëve të solidarizohen me protestën antiqeveritare në vendin fqinj, Bosnje . "Ne nuk mund të paguajmë 500 euro faturat tona të energjisë elektrike me pagë mujore 100 euro", tha organizatori i protestës. Nga ana e saj, policia ka akuzuar protestuesit si përgjegjës për dhunën. "Ata sillen në mënyrë agresive, sulmuan policisë, qëlluan me gurë ndaj tyre, prishën rendin publik", thuhej në deklaratën e policisë. Janë arrestuar 20 prej protestuesve, mes të cilëve ishin edhe 2 gazetarë malazezë. Kryetari i Komunës Podgoricë, Miomir Mugosha njoftoi se do të ngrejë akuza penale kundër njerëzve që shkaktuan dëme në ndërtesat publike, kurse Prokurori urdhëroi 48 orë paraburgim për protestuesit që u arrestuan mëngjesin e së dielës. (v.gj/ shqiptarja.com