Apple kërkon 2.2 miliardë dëmshpërblim nga Samsung

Apple kërkon 2.2 miliardë dëmshpërblim nga Samsung TIRANE -Dy kompanitë më të mëdha për prodhimin e pajisjeve teknologjike, Apple dhe Samsung, shkojnë përsëri në gjyq. Ato akuzojnë njëra-tjetrën për kopjim të karakteristikave të pajisjeve inteligjente. Tani është thënë se Apple ka kërkuar që kompania koreane Samsung të paguajë një dëmshpërblim prej 2.2 miliardë dollarë me pretekstin se kjo kompani ka përdorur 5 nga patentat e saj kur ka prodhuar telefonat inteligjentë. Christopher Vellturo, i punësuar nga Apple si ekspert i dëmeve, tha në gjykatën e qarkut në SHBA, në Kaliforni, se këto patenta janë përdorur nga Samsung për të shitur mbi 37 milionë telefona inteligjentë dhe tabletë nga gushti i vitit 2011 deri në fundin e vitit të kaluar. Gjyqi i fundit Apple-Samsung vjen rreth dy vjet pasi një gjykatë federale shpalli Samsung-un fajtor për kopjimin e teknologjisë dhe karakteristikave të pajisjeve të Apple-it. Samsung u dënua me 900 milionë dollarë, por ka apeluar çështjen dhe është lejuar ndërkohë të vijojë të shesë produktet që përdorin këtë teknologji. (er.nu/BalkanWeb)